Өңірді газдандыру: кәсіпкерлер бақылауды күшейтіп, кепілдік міндеттемелерін енгізуді ұсынды
Қарағанды облысының Кәсіпкерлер палатасында Құрылыс және құрылыс индустриясы кеңесінің жанындағы газдандыру мәселелері жөніндегі жұмыс тобының отырысы өтті. Кездесудің модераторы және төрағасы ретінде «КарГорГаз» ЖШС директоры Саламат Айрамбаев сөз сөйледі.
Талқылауға Энергетика және ТКШ басқармасы, құрылыс бөлімі, мәслихат, «ҚазТрансГаз Аймақ», техникалық және авторлық қадағалау өкілдері, сондай-ақ жобаларды іске асыруға тартылған кәсіпкерлер қатысты.
Кездесу барысында Қарағанды, Теміртау, Шахтинск және облыстың басқа да елді мекендерін газдандыру бағдарламасының жүзеге асырылу барысы қаралды. Жабдықтардың сапасына, технологиялық бұзушылықтарға, тиісті техникалық қадағалаудың болмауына және тұтынушылар үшін туындайтын қауіп-қатерлерге қатысты проблемалық мәселелер көтерілді.
Саламат Айрамбаев өз сөзінде бұл жиынның мақсаты есеп беру емес, нақты шешімдер табу екенін атап өтті:
«Анық мәселелерге көз жұмуға болмайды. Газдандыру — бұл тек құбырлар мен іске қосу кешендері ғана емес, ең алдымен — қауіпсіздік. Егер шкаф бірінші маусымда істен шықса, егер клапан жұмыс істемесе — бұл дабыл. Оның үстіне, елеулі дабыл», — деді ол.
Кәсіпкерлер тарапынан мердігер ұйымдарға сын айтылды. Олардың айтуынша, нысандар жиі авторлық және техникалық қадағалаусыз тапсырылады.
«Біз қатысуға қарсы емеспіз, бірақ өз жауапкершілігіміздің шекарасын нақты түсінгіміз келеді. Ал техникалық мамандар мүлде тартылмаса — бұл жұмыс емес, формалдылық қана», — деді бизнес өкілдерінің бірі.
Қарағанды облысының Энергетика және ТКШ басқармасы басшысының орынбасары Айдар Болатов ведомствоға мұндай сигналдардың келіп түсіп жатқанын растап, жүйелі әрекет етуге дайын екенін жеткізді:
«Барлық анықталған фактілер тіркеліп жатыр. Біз көшпелі тексерулер жүргізуге, қадағалауды тартуға және жобалық құжаттаманы түзету қажеттілігін талқылауға дайынбыз. Газдандыру заманауи талаптарға және ең бастысы — халықтың үмітіне сай болуы керек», — деді ол.
Кездесу барысында жабдықтардың мерзімінен бұрын тозуы, газ жеткізудегі үзілістер мен жобалық қателіктерге байланысты типтік шешімдерді қайта қарау қажеттігі айтылды. Кәсіпкерлер жабдықты күтіп-ұстау мен ауыстыру бойынша жеткізушілердің нақты кепілдік міндеттемелерін енгізуді ұсынды.
Сонымен қатар, газ шаруашылығында кадр тапшылығы мәселесі көтерілді.
«Біз жүйені дамытамыз дейміз, бірақ мамандарсыз ол жұмыс істемейді. Келесі жылдары кадр тапшылығына ұрынбас үшін кадр даярлау тәсілдерін қазірден бастап қайта қарау қажет», — деді құрылыс саласының өкілдері.
Жиын соңында қатысушылар халықпен кең көлемде ақпараттық жұмыс жүргізу қажеттігі жөніндегі Кәсіпкерлер палатасының ұсынысын қолдады.
«Егер сенімге ие болғымыз келсе — ашықтық қажет. Журналистерді, блогерлерді, қоғам белсенділерін тарту — бұл жай көзбояушылық емес. Бұл — жұмысты тиімді етуге көмектесетін бақылау тетігі», — деп қорытындылады Саламат Айрамбаев.
Пікір қалдыру:
Пікірлер: