Көкшетауда «Қазақстанның үздік тауары» дәстүрлі көрме-байқауы өтті

2023 жылғы 21 Шілде

- Ақмола облысы

13485 просмотров

Биыл өңірлік көрме-байқауға 90-ға жуық ақмолалық өндіруші қатысты. Көкшетау қаласының «Тәуелсіздік» алаңында шатырлы қалашық ашылды. Онда тамақ және жеңіл өнеркәсіп, машина жасау, құрылыс индустриясы кәсіпорындарының өнімдері ұсынылды, деп хабарлады Ақмола облысы кәсіпкерлер палатасының баспасөз қызметі.

Облыс әкімі Ермек Маржықпаев өзінің алғы сөзінде экономиканың өңірлік секторының маңызды көрсеткіші шағын және орта бизнесті дамыту, жалпы бизнес-ахуалды жақсарту және кәсіпкерлікті жан-жақты қолдау – басты басымдықтардың бірі болып қала беретінін атап өтті.

«Бұл іс-шараны кәсіпкерлер-отандық тауар өндірушілер үшін жылдың басты оқиғасы, олардың өнімдерін ішкі нарықта белсенді ілгерілету үшін қуатты ынталандыру деп санауға болады. Әр уақытта өткізілетін өңірлік байқаулар лауреаттар қатарында «Тыныс», «Көкше-Цемент», «САПА Су», «Бижан ҮАК», «Ижевский» ӨК сияқты танымал компаниялар болды. Кейіннен көптеген кәсіпорындар өңірді республикалық деңгейде лайықты түрде тыныстырып келді. Атап айтқанда, «Қазақстанның үздік тауары» республикалық көрме-байқауында «БЛЭК» ЖШС, «CAPITAL PROJECTS LTD», «ENKI», «САПА Су» жеңімпаздары атанды. Өнім сапасы саласындағы үздік нәтижелерге қол жеткізгені үшін Қазақстан Республикасы Президентінің «Алтын сапа» сыйлығымен «Агрофирма TNK», «Гормолзавод» ЖШС, «AZAM-KC», «Интер Трейд» марапатталды. Бұл кәсіпорындардың барлығы – облысымыздың мақтанышы», – деді өңір басшысы.

Беделді байқауға алғаш рет қатысқан көптеген компания бар. Атап айтқанда, «SG BRICK» кірпіш зауыты – Орталық Азия елдерінің арасында дайын өнім шығару көлемі жылына 120 млн данаға жететін жалғыз зауыт. Өндіріс үшін табиғи газ салқындатқыш ретінде пайдаланылады, жылдық қажеттілік 18 миллион текше метрді құрайды. Кәсіпорынның бастамашысы және құрылтайшысы «GPark» ЖШС құрылыс компаниялары тобының бас директоры Ғабит Сатмағамбетов.
Қосшы қаласының тұрғыны Анара Ибраева да алғаш рет көрме-байқауға қатысты. 2015 жылдан бастап кәсіпкер экологиялық таза, диеталық өнімдер, дұрыс тамақтану тәттілері, кремсіз, бояғыштарсыз өндім шығарумен айналысады. Осы мақсатта кәсіпкер ауыл шаруашылығы магистрі ретінде Германияда арнайы тағылымдамадан өтті.

«Қазақстанның үздік тауары» байқауын өткізу тарихында тұңғыш рет «Бір ауыл – бір өнім» көрмесі ұйымдастырылды. Онда Ақмола өндірушілерінің бірегей және ерекше өнімдері ұсынылды. «Бір ауыл – бір өнім» кәсіпкерлікті дамыту жөніндегі ұлттық жоба шеңберінде 2023 жылдан бастап елде іске асырылып келе жатқан «Мен – кәсіпкер» құралының негізгі бағыттарының бірі. Оның ерекшелігі – өңірдегі бірегей өнімді іздеу, жергілікті тауарлар мен өнімдер өндірісін дамыту, негізінен ауылдық жерлерде, сондай-ақ тек жергілікті шикізатты пайдаланатын өндірушілерді біріктіруге бағытталған.
Айта кетейік, көрмеге келушілер азық-түлік және басқа да өнімдерді нарықтық бағадан төмен бағамен сатып ала алады. Сонымен қатар, аймақтың танымал компаниялары мен кәсіпорындарынан лотерея ұтыс ойыны өтті. Лотереяның жүлде қорына өз үлесін қосқан Ақмола облысының іскер әйелдер кеңесі де шетте қалмады.

Байқау іріктеуі қорытындысы бойынша барлық үш номинация бойынша жеңімпаздар анықталды. «Өндірістік мақсаттағы үздік тауарлар» номинациясында «SG BRICK» ЖШС (Аршалы ауданы), «Азия фильтр» ЖШС (Бурабай ауданы), «Макинск жылу оқшаулау зауыты» ЖШС (Бұланды ауданы) көшбасшы болды.
«Халық үшін үздік тауарлар» номинациясында – «Забарный» ЖК (Атбасар ауданы), «Әлихан» ЖК (Қосшы қаласы), ««Арман» трикотаж кәсіпорны» ЖШС (Көкшетау қаласы).
«Азық-түлік мақсатындағы үздік тауарлар» номинациясында «Гормолзавод» ЖШС (Көкшетау қ.), «Андрющенко» ЖК (Ақкөл ауданы), «БАХА SÖHNE» ЖШС (Атбасар ауданы) топ жарды.
Өңірлік байқаудың жеңімпаздары осы жылдың соңында елордада өтетін «Қазақстанның үздік тауары» республикалық байқауына қатысады.

«Жеңіс қана емес, беделді көрме-байқауға қатысу экспонент-кәсіпорындарға үлкен перспективалар береді. Негізгі артықшылығы – жергілікті өнімді немесе брендті ілгерілету, жаңа шарттар жасасу және өндірістің сапалы жаңа деңгейіне көшуге арналған бастапқы алаң. Мұндай формат қазіргі нарықтың серпінінде қол ұстасуға мүмкіндік береді, көрме қорытындысы бойынша жобалардың көпшілігі өз тауарлары мен қызметтерін күтілетін танымалдылыққа ие болады», – деп атап өтті Ақмола облысы кәсіпкерлер палатасының директоры Ерқанат Мұсылманбек.