Павлодарлық шаруа қожалығына жерді жалға беру мерзімі негізсіз ұзартылмаған

2023 жылғы 15 Мамыр

- Павлодар облысы

4277 просмотров

«Атамекен» Павлодар өңірлік палатасының кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңесі өз отырысында «Грязновка» шаруа қожалығының мәселесін қарады. Ақсу қаласының жер қатынастары бөлімі Павлодар облысының Жер ресурстарын басқару департаментінің нұсқамасын елемей, осы қаланың Еңбек және М. Омаров атындағы ауылдық округтерінде жерді жалға беру шарттарын ұзартудан заңсыз бас тартты.

«Грязновка» ШҚ ақпараты бойынша, бұл шаруа қожалығы Павлодар облысының Жер ресурстарын басқару департаментіне жалдау шарттарын ұзартудан заңсыз бас тартқаны үшін шағым түсірді. Осы шағым бойынша департамент Ақсу қаласының жер қатынастары бөліміне тексеру жүргізді.
10 наурызда «Грязновка» ШҚ Ақсу жер қатынастары бөліміне жалдау шарттарының мерзімін ұзарту туралы өтініш білдірді. Жалдау мерзімі 2022 жылдың 10 мамырында аяқталуы керек еді. Яғни, шаруа қожалығы өтініш беру мерзімін бұзбай, жалдау шарттарын ұзарту шарттары бойынша тиісті міндеттерді атқарды. Бірақ жер комиссиясы 2022 жылдың 30 наурызында жерді уақытша пайдалануға беруден бас тартты.

«Осы шағым бойынша тексеру барысында жер учаскелерін нысаналы мақсаты бойынша пайдаланбау фактісі болмағаны анықталды. Бұдан басқа, осы жер учаскелерін нысаналы мақсаты бойынша пайдалану agro.garysh.kz сайттағы мәліметтермен расталады.Бұл жер учаскесін бөлуден заңсыз бас тарту «Грязновка» ШҚ құқығын бұзады дегенді білдіреді», - деді Павлодар облысының кәсіпкерлер палатасында.

Ақсу жер қатынастары бөліміне Павлодар облысы бойынша жер ресурстарын басқару департаменті жүргізген тексеру нәтижелері бойынша жер заңнамасын бұзушылықтарды жоюға, атап айтқанда, осы учаскелерді жаңа мерзімге беруге нұсқама берілді. Бірақ Ақсу жер қатынастары бөлімі бұл нұсқаманы елемеді және оны әлі орындамады, сондықтан департамент сотқа жүгінуге мәжбүр болды.
Жер комиссиясының 2022 жылғы 30 наурыздағы шешімі шаруа қожалығына танысу үшін ұсынылмады.

Өз отырысының қорытындысы бойынша Павлодар облысы кәсіпкерлер палатасының кәсіпкерлердің құқықтарын қорғау және сыбайлас жемқорлыққа қарсы іс-қимыл жөніндегі кеңесі осы өтініш бойынша шешімнің көшірмесін және материалдарды қарау үшін Павлодар облысының прокуратурасына, Павлодар облысының жер ресурстарын басқару департаментіне және Ақсу қаласының әкімдігіне жіберуді ұсынды.