Жақсыдан үйрен
Өз бизнесіңді басқа табысты кәсіпкерден үлгі ала отырып бастау керек
Облыстың Кәсіпкерлер палатасы «Бизнестің жол картасы-2020» бағдарламасы аясында «Жобалық оқытуды» ұйымдастырып жатыр. Соның арқасында өз бизнесін басқалардан үлгі алып бастағысы келетіндерге көмектеспек.
Облыстың әрбір ауданындағы табысты кәсіпкерлердің арасынан тәлімгерлер анықталды. Кәсіпорынның немесе ферманың базасында, өз ісін енді бастаған кәсіпкерлер бизнесті тиімді жүргізудің қыр-сырын үйренеді. Биылғы жылы барлығы 65 адам ондаған тәлімгерден сабақ алады. Бүгінгі таңда екі айлық оқуды 59 кәсіпкер аяқтады.
«Курстың мақсаты – тәжірибелі білім беру, нақтырақ айтқанда –аудандарда, моноқалаларда, облыс орталықтарында нақты бизнес түрін ашу және дамыту бойынша нұсқаулық беру, сондай-ақ табысты кәсіпкерлердің қатысуымен қолданыстағы жобаларды басшылыққа ала отырып, тәжірибелік дағдыларды пысықтау», – деді Кәсіпкерлер палатасының кәсіпкерлікті қаржылық емес қолдау бөлімінің басшысы Диана Түкпетова.
«Елеуов М» шаруа-фермерлік қожалығы Жамбыл ауданында 1997 жылдан бері жұмыс істеп келеді. Кәсіпорын басшысы Марат Елеуовтің айтуынша, өндірістегі бүкіл сүт өнімділігі 150-180 литр. Бүгінде 100 бас ірі қараның ішінде 28 сиыр сүт береді. Фермердің алдағы жоспарында – ет өндіру ісіне бағытталған бордақылау алаңдарын салу тұр. Ал әзірге ол жоба аясында тәлімгер ретінде өзінің тәжірибесі мен білімін басқаларға үйретіп жүр.
«Менің бизнесім жүріп тұр, 1,5 гектар жерім бар. Әрқашанда дамып отыру керек. Сол үшін де осында білім алуға келдім. Көп жаңа дүниелерді үйрендім, – деді оқуға қатысып жүрген Жамбыл ауданының кәсіпкері Еркінбек Сырғақов. – Қазіргі таңда несие алу үшін құжаттар тапсырып қойдым. Ол ақшаға 10-15 жылқы сатып алуды жоспарлап отырмын».
Пікір қалдыру:
Пікірлер: