Қазақстандық өнеркәсіп ошақтарының сапасын кім анықтайды? Отандық тауарөндірушілер әлемдік сапа стандарттарына сай келе ме? Кәсіпкерлеріміз халықаралық аренада танымал брендтермен таласа алады ма? Осы сауалдарға бүгін «Атамекенде»  «Азиялық сапа конгресі ANQ- 2018» арналған таңғы ас шарасында  жауап берілді.

Республикалық бұқаралық ақпарат құралдары журналистерімен кездесуге Қазақстанның сапа және инновациялық менеджменті ұйымының президенті, Азиялық сапа ұйымының басқарма төрағасы, Халықаралық Сапа академиясының академигі, халықаралық аудитор, халықаралық асессор, профессор Азат Абдрахманов және «Атамекен» ҚР ҰКП Сапаға байланысты республикалық конкурстарды ұйымдастыру департаментінің Басқарушы директоры Салтанат Абдикаримова қатысты.  

«Азиялық сапа конгресін өткізу- мемлекетіміз үшін үлкен жауапкершілік. Өйткені Азия, Европада да бізді сапа жағынан әлі білмейді. Кейінгі он жылдың көлемінде қазақстандық мамандар осы бағытта жұмыстар атқарып келеді. Сапа бойынша Азияда ғана емес дүние жүзінде танымал ел- Жапония. Өздеріңізге мәлім бұл елде бір литр, милилитр мұнай жоқ, бір куб газ жоқ, метал өндірілмейді. Соған қарамастан озық технологиялар, машина жасау, электроника, кеме жасау ісінде жапон елінің бәсі жоғары. Одан кейін – Оңтүстік Корея. Daewoo,  Samsung т.б. компаниялары әлемдік бренд. Ал Қытай халық республикасы қазіргі уақытта «Қытайда жасалған» атауынан гөрі «Отаны Қытай» деген сөз тіркесін ұсынып отыр. Яғни осыған дейін өндірілген өнімдердің Apple, iPhone, iPad, Sony Ericsson т.б. әлемдік брендтердің көшірмесін шығарумен шектелген болса енді қытайдың  өзінің ғалымдары, өнертапқыштары ойлап тапқан деп мақтанышпен айту идеясын алға сүйреп, сапаға мән беруде. Haier, ZTE, Huawei және тағы басқа әлемдік брендтердің туған отаны- Қытай. Техника, автокөліктер, құрылыс техникасының көпшілігі көрші Қытайда шығады. Сонымен қатар, Индия, Сингапур, Въетнам елдері қарыштап даму үстінде. Қазақстан бұл елдермен қатар тұруына ешқандай кедергі жоқ, әлеуетіміз жетеді. Қайсы саланы алсақ та сапа мәселесі санамызда  тұруы керек», – дейді Азат Абдрахманов.  

Қазақстанның сапа және инновациялық менеджменті ұйымының президентінің айтуынша, дамыған елдердің сапа жағынан танымал тұлғаларын қазақстандық ортаға таныстыру, арнайы диалог алаңын құру маңызды шара.

«Атамекен» ҚР ҰКП кейінгі жылдары  «Алтын сапа», «Қазақстанның үздік тауары» деген ұлттық брендті насихаттап, елге танытып үлкен іс-шаралар атқарып жүр. Бұл өте жақсы бастама, неге десеңіз әлемдік сапа байқауларына қатысу үшін де өз елінде танылған, мойындалған ерекше мәртебе»,-деді  профессор.

Екі күнге созылатын конгресс жұмысына сапаны басқару саласы бойынша дүние жүзіне әйгілі Нориаки Кано (Noriaki Kano) (Жапония), Клаус Берлин (Claes Berlin) (Швеция), Элизабет Кейм (Elizabeth Keim) (АҚШ), Мухаммед Заири (Mohamed Zairi) (Англия), Жухани Антилла (Juhani Antilla) (Финляндия) Ван-Сен Шин (Wan-Seon Shin) (Оңтүстік Корея) келіп қатысады. 

«Конгреске құрметті қонақ ретінде келетін Н.Кано «Айрықша сапа моделін» ойлап тапқан әлемдік ғалым. Мәселен, сапада Сіз маған талап қоясыз, мен оны орындаймын. Сіз алған өніміңіз үшін, көрген қызмет түрі үшін алғыс айтасыз. Келесіде Сіз маған сенім артып, қайта айналып, қуана келесіз. Яғни Сіздің өніміңіз немесе қызметіңіз сапаның ең жоғары талаптарына жауап береді. «Айрықша сапа моделі» арқылы Кано туған елі -жапондарды әлемге танытты. Осы модель арқылы ол бір кездердегі қарапайым мекемелерді әлемдік брендке айналдыруға мұрындық болды. Және Кано жасының ұлғайып қалғанына қарамастан әлі де әлемдік құрылыс компаниясының кеңесшісі қызметін атқарады.

Екінші қонағымыз Мухаммед Заири (Mohamed Zairi) Англиядан келген профессор таяуда «Төртінші өнеркәсіптік революция кезеңінде сапа  рөлі» деген кітап шығарды. Біз индустриаландыру, цифрландыру, компьютерлендіру дейміз. Барлық нәрсені компьютерге түсіруге болады. Соның ішінде адамның рөлі, менеджменттің рөлі қандай? Басқару жүйесі керек пе жоқ па? Бұл жағдайларда сапа мәселесіне жауапты адамдар не істеу керек деген сауалға жауап табасыз оның кітабынан. Кітаптың тұсаукесері осы конгресс аясында Алматыда өтеді»,- деді Азат Абдрахманов.

-Конгресс жұмысына шетелдік 200 ге жуық маман қатысуға өтініш берген екен. Қазақстандық қанша маман тіркелді?

-Өкінішке қарай отандық мамандар санаулы ғана...

-Сонда біздің қатысушыларымызға ақпарат жетпей жатыр ма, әлде қатысу бойынша талап күрделі ме?

-Меніңше бізде әзірге түсінік қалыптаспаған деп айтар едім. Біз бұл әдеттегідей ғылыми конференция деп қабылдайтын сияқтымыз. Мұның еліміз үшін маңыздылығын осы жолы көріп, біліп, танитын шығармыз деп үміттененмін. Себебі конгресс барысында өтетін симпозиумдарда сапа салалар бойынша қарастырылады. Яғни білім сапасы, инновация сапасы, қызмет көрсету сапасы, қызметкерлерді басқару сапасы, тауар сапасы, менеджмент сапасы сияқты тақырыптар төңірегінде сессиялар өткізіледі. Шетелдіктерден 140- қа жуық ғылыми баяндама түсті. Қазақстаннан бір-екі-үш-төрт – бес, айтуға ұят... Тағы бір айт кетерлігі- Азиялық сапа конгресі коммерциялық ұйым емес, бұл еркін алаң. Біз материалдық пайда көздеп отырған жоқпыз.

Конгрестің бірінші күні конференция, симпозиум, альянс жиыны, ал екінші күні қатысушылар үшін қазақстандық кәсіпорындарға техникалық сапар жоспарланған. Азиялық сапа конгресінің арнайы сыйлығын жеңіп алу үшін, қазақстандық компаниялар үміткер.

«Конгрестің екінші күні әлемдік сапа саласының өкілдері Алматыдағы «Семирамида», «Бахус», «Алматыөнім», «Сайман» корпорациясы, Ауыр машина жасау зауыты сияқты өндіріс ошақтарын аралайды. Білім сапасы бойынша сипозиум Қазақ ұлттық университетінде өтеді. Биыл конгресс аясында қарастырылған сыйлықтарға ұсыныс білдіргендер саны біршама. Жеңімпаздарды комиссия анықтайды. Ешкімге жасырын емес, «Атамекен» ҚР ҰКП ұйымдастырған «Алтын сапа» және «Қазақстанның үздік тауары» ұлттық сапа сыйлығының жеңімпаздары арасынан «Алматы көпір құрылымдары зауыты» АҚ номинанттар қатарында тұр,-деді Салтанат Жақсылыққызы.

Айта кетейік, «Атамекен» ҚР ҰКП  Қазақстанның сапа және инновациялық менеджменті ұйымымен «ХYІ Азия сапа конгресі ANQ- 2018» шарасын ұйымдастыру бойынша серіктес.

Конгресс  2018 жылдың 19-20 қыркүйегі аралығында Алматы қаласындағы  «Интерконтиненталь» қонақ үйінде өтеді.

Анықтама үшін:

Азиялық сапа желісі 2002 жылы құрылған, оған Азиядағы 17 ұлттық сапа ұйымдары мүше. 2003 жылдан бері әр жыл сайын сапа конгресі өтеді. Халықаралық шара біздің елімізде тұңғыш рет ұйымдастырылып отыр. Қазақстанның сапа және инновациялық менеджменті ұйымы былтырдан бері Азиялық сапа ұйымының төрағасы.